Проекти за подршка

Камп за надградба на капацитетите на членови и волонтери на ООЦК Гази Баба

Волонтерите се насекаде препознаени како најважен ресурс за спроведување промени. Волонтерската работа е неплатена активност на млади и возрасни личности. Доброволната работа, односно работата со загрозани целни групи, посетувањето на обуки, семинари им овозможува на поединци да развијат свои вештини, да научат нови, да развијат способности и можности, а целокупната работа, труд и енергија кои ќе ги вложат, им овозможуваат еден ден, благодарение на волонтерската работа, да најдат за себе вработувење. Младите во Црвениот крст волонтираат од многу причини. Од желба за да им се помогне на оние на кои помошта им е потребна, да бидат корисни за заедницата, како и сопствени интереси, односно желба за запознавање на нови луѓе, учење на нови вештини или полезно користење на слободното време. Со волонтирањето ја прикажуваат подготвеноста за извршување на работни обврски, се чувствуваат корисно и имаат работно искуство, запознаваат нови луѓе, им помагаат на другите, бидејќи, како што велат тие е добро чувството да се чувствуваш добро кога правиш добро.
Волонтирањето на младите им дава можност за вклучување во промените во општеството, можност за мобилност, стекнување социјално и работно искуство, како облик на сопствено неформално учење.

Волонтерската работа, за нашата организација, претставува професионален и одговорен пристап пред се кон волонтерите, но и за самата заедница. Црвениот крст е организација која со своето успешно менаџирање / координирање успева јасно да го дефинира проблемот кој треба да биде решен по пат на волонтерската работа, времетраењето на нивниот ангажман, утврдување на личностои кои се задолжени да работат со волонтерите, да се одредат обврските на еден волонтер, неговите права, изнаоѓање начин на кој волонтерите ќе бидат мотивирани, методи за нивни обуки и начини на кои ќе им биде пружана потребната подршка. За целокупното успешно ангажирање на волонтерите, потребно е нивно наградување.

Наједноставната награда за волонтерите се волонтерските кампови. Тоа е незаборавно искуство за секој волонтер. Целта е волонтерите да му помогнат на општеството со решавање на некој одреден проблем, а за возврат имаат на располагање бесплатно сместување, храна и превоз. ООЦК Гази Баба е организатор на еден таков камп за своите волонтери, камп на кој волонтерите ќе живеат и работат заедно меѓусебно ќе разменуваат искуства и ќе се стекнуваат со нови, ќе учат нови вештини и ќе се чувствуваат дека поради нешто вредат повеќе од другите.
ООЦК Гази Баба е една од ретките општински организации кои располагаат со голем број на волонтери кои посветуваат многу време и труд да ја направат организацијата успешна каква што е. Волонтерите се екстремно важно средство во нашата организација. Едноставно, многу активности кои ги реализира ООЦК Гази Баба не би можеле да се реализираат без нивната помош.
Работата со млади и за млади во целост е една од приоритетните задачи на нашата организација. Во изминатите четири години со формирањето на Клубот на млади, ООЦК Гази Баба работи на создавање на креативно јадро на млади активисти и волонтери кои сега даваат целосен допринос во развитокот на нови идеи и реализација на програмата за работа.
Големиот број на активности и креативни работилници во кои се ангажирани младите во организација на ООЦК Гази Баба создаваат предуслов за ненасилна комуникација, хуман однос, учење на здрави начини на живот и подготовка за влез на младите во светот на возрасните.

Сите активности се реализираат во текот на целата година, но, посебен акцент е ставен за време на летниот распуст кога сите капацитетети, материјални и човечки се свртени кон младите. ООЦК Гази Баба во летниот период реализира различни активности посветени на младата популација.
Од редовите на подмладокот најчесто израснуваат во вистински млади волонтери и лидери, кои, се сега веке едуцирани и со искуство и имаат можност сами да се иницираат, смислат и реализираат активности и акции. Од нив произлезе и идејата да се организира летен камп на кој ќе учествуваат најактивните волонтери кои на овој камп ќе го продлабочат своето знаење за организацијата и ќе развијат потреба и понатаму да се агажираат во работата. Нашата цел на овој камп ќе биде да создадеме волонтери и идни лидери кои ќе негуваат љубов кон организацијата и кон луѓето во неа.
Со цел попрофесионално реализирање на проекти кои придонесуваат во олеснување на животните потешкотии на граѓаните, потребна е континуирана надградба на капацитетите со кои располага ООЦК Гази Баба.

Поради потребите на ООЦК Гази Баба организира камп - обука на која младите волонтери ќе се обучуваат за изработка на проекти, извештаи, работа на привлекување нови волонтери и задржување на старите, тимска работа и дисеминација. Со таа обука ќе се случи зајакнување на капацитетите на волонтерите од Клубот на млади при Општинската организација на Црвен Крст „Гази Баба” - Скопје и тие ќе можат да дејствуваат на повеќе аспекти од социјалниот живот на граѓаните на Општина Гази Баба и да се обидат да направат позитивни промени во општеството преку реализирање на своите идеи во проекти.

Заштита и самозаштита во услови на катасторфи во образовните институции

Програмот за подготвеност и дејствување во случај на катастрофи е една од клучните - приоритетни активности на Црвен крст на Република Македонија. Програмот е многу обемен опфаќа низа мерки кои се превземаат пред да се случи катастрофа, кои допринесуваат активностите на Црвен крст во случај на катастрофа да дадат брза и адекватна помош на ранливото население.

Црвениот крст на Република Македонија во изминатите десет години интензивно работеше на планот за подготвеност и дејствување во случај на катастрофи. Бројните кризи кои го зафатија нашиот регион со распадот на СФРЈ (босанската, косовската , внатрешниот конфликт 2001, поплави, пожари снежни намети, епидемии, енормно високи температури) со кои успешно се справуваат волонтерите и вработените, се најдобар показател за стекнатите искуства. Нашите активности беа поддржани од страна од Меѓународната федерација на Црвен крст и Црвена полумесечина (МФЦК/ЦП), Програмата за развој на Обединетите нации УНДП, Меѓународниот комитет на Црвен крст (МКЦК), Канцеларијата на високиот комесаријат за бегалци на Обединетите нации УНХЦР и други партнери и агенции. Активностите на нашите волонтери и вработени беа позитивно оценети од сите релевантни фактори во државата и странство, што придонесе Црвениот крст да стане дел од системот за управување со кризи, заштита и спасување. Голем број на волонтери и вработени завршија специјализирани курсеви во земјата и странство од областа на катастрофите.

Следејќи ги принципите на движењето на Црвениот крст, Стратегијата 2020 на ИФРЦ, Законот за Црвен крст, меморандумите за соработка со Центарот за управување со кризи на РМ, Дирекцијата за заштита и спасување на РМ и успешната соработка со Локалната самоуправа, како и стандардните оперативни процедури донесени од страна на ИФРЦ, ИЦРЦ, УНХЦР, Црвениот крст на Република Македонија, постојано превзема активности за минимизирање на загубите на човечки животи во случај на катастрофи.
Развиената мрежа на општински организации на Црвен крст, професионалци и голем број на волонтери ни овозможува да ги согледуваме потребите на локалните заедници, ранливите состојби и капацитети кои ни се на располагање.

Постојаното надградување на дата базата, ни овозможува контуирано следење на потребите на нашите организации и заедниците во средините каде што делуваат, за зголемување на своите капацитети како и подготвување на планови за подготвеност во случај на катастрофи, а и навремен одговор во случај на катастрофа, кое е дел од главната цел на програмот за подготвеност и дејствување во случај на катастрофи, а тоа е: Подготвеност за брзо и ефикасно дејствување во случај на катастрофи.

За да се подигне јавната свест во образовниот систем во државата , Црвениот крст на Република Македонија, во соработка со Бирото за развој на образованието, Центарот за управување со кризи, Дирекцијата за заштита и спасување, работи на подигање на јавната свест кај младата популација за заштита и самозаштита во случај на катастрофи.
Почетоците за изградба на информатичкиот систем во Црвениот крст на Македонија на полето на катастрофи, започна во 2002 година, во која се изработи програм за внесување податоци за можни катастрофи во Република Македонија, капацитети на Црвен крст (материјално технички и човечки ресурси, структурна поставеност на Црвен крст, проценка од загрозеност, географски податоци, капацитети за сместување, население и населби и друго на ниво на Република Македонија и општинските организации.

Во 2008 информатичкиот систем беше надграден (модернизиран) со нов софтвер Глобал мапер кој содржи дигитална карта на Република Македонија каде што може да се картираат сите ризици и да се отвори дата база за секој ризик. Исто така теренот може да се гледа во 3Д. Самиот софтвер е доста едноставен за користење и има голема примена во мапирањето на ризици и капацитети, а исто така може да се прават и симулации на поплави.

Изградбата на партнерски однос со одговорните структури на државно и локално ниво, заради воспоставувањето на ефикасни механизми на координација и менаџирање на катастрофите врз основ на постојаната Законска регулатива на РМ., доведе до поефикасен систем за подготвеност и одговор на катастрофите, која во иднина треба да се надоградува на државно и локално ниво.
Во обид да се следи Визијата на планот за подготвеност и дејствување во случај на катастрофи на ЦКРМ, како и Националната платформа за намалување на ризици од катастрофи на Р.М која произлезе од Меѓународната стратегија за намалување на катастрофи(ИДРР), Црвниот крст на Република Македонија како дел од системот за управување со кризи, на активностите на овој план дава голем приоритет.

Со финансиска поддршка на Меѓународната федерација на Црвен крст и Црвена полумесечина, Црвен крст на Р.М во 2009/10 реализира проект активности за намалување на ризици од несреќи и катастрофи во микрорегионите Струмица, Велес, Кичево, Охрид и Струга.
Со оглед на успешноста на реализираните проекти и потребата за продолжување на проектот во други микрорегиони во РМ, од страна на Меѓународната федерација на Црвен крст и Црвена полумесечина одвоени се финансиски средства и за 2011. (АКТИВНОСТИ ЗА НАМАЛУВАЊЕ НА РИЗИЦИ)
Од направената регионална анализа во кои микрорегиони би се имплементирал проектот се донесе заклучок дека треба да бидат опфатени микрорегионите во Прилеп Крушево и Македонски Брод.

Во 2013 година, истиот проект се имплементира во микрорегионите Валандово и Дебар (Центар Жупа), финансиран од страна на Турската полумесечина.
Во Република Македонија според член 39 од Законот за заштита и спасување (службен весник на РМ бр.36/04) е предвидено образовните институции да имаат планови за евакуација во случај на катастрофи и несреќи. Истражувањата на ЦКРМ, покажуваат дека законот не е целосно имплементиран во сите делови на државата. Проектните активности, овозможуваат да се зајакнат капацитетите на локалните власти, преку изработка на процени со ризици за регионите и изработка на технички елаборати за регионите и селектираните образовни институции. Дополнително е предвидено да се спроведат предавања за заштита и самозаштита, прва помош, промоција на хигиена и адаптација кон климатски промени на персоналот во училиштата, кои ќе го пренесат своето знаење на учениците. Покрај предвидениот теоретски дел, овој проект овозможува и организација на практична вежба со цел да се изврши реална евакуација на учениците и персоналот.

ДА на играта НЕ на насилството

Насилството отсекогаш било присутно секаде околу нас и неговото постоење никако не можеме да го порекнеме. Него го има на филмовите, на видео игрите, во реалниот живот, а децата како успешни имитатори истото го применуваат и во училиштето, врз своите соученици. Ученикот е жртва на врсничко насилство доколку понекогаш или постојано е изложен на негативните постапки, т.е. е задеван на начин кој нему не му се допаѓа од страна на еден или повеќе други ученици. Меѓутоа насилството меѓу младите не останува во училиштето, тоа најчесто продолжува и надвор од него.

Врсничкото насилство може да се појави во најразлични облици. На прво место е вербалното насилство кое е исполнето со закани, омаловажувања, навредувања, дофрлувања и слично. Физичкото насилство во нашите училишта се јавува во форми на тепање, туркање, препнување, т.е. нанесување болка врз одреден ученик на кој било начин. Посебен облик на насилство, кој е најчесто присутен во училиштата, е изолацијата, отфрлањето од друштвото, игнорирањето, наметнатиот притисок врз другите за да не се дружат со одредено дете и сите други обиди што целат да му наштетат на поединецот и да му го уништат угледот во околината. Ова насилство многу често влијае врз понатамошниот социјален развој на детето. Врз младиот човек, т.е. врз неговиот психички развој, многу негативно влијаат и изнудувањето пари, исмејувањето, крадењето, потоа и злоставувањата врз основа на расната, националната и верската припадност на одредена индивидуа. Во нашите училишта, иако поретко, присутно е и сексуалното насилство и тоа преку несакано допирање, штипење и преку делење вулгарни (со сексуална конотација) коментари.

За присутноста на насилството по училиштата можеме да ги земеме резултатите од исражувањето на Детската амбасада Меѓаши спроведено во 2009 година врз 2 234 испитаници, ученици во основни и средни училишта, во кое се потврдува фактот дека насилството е во пораст и дека е насекаде присутно: во училиштата, во семејствата, на улиците. Дури 56% од испитаниците потврдиле дека има насилство во нивното училиште, а 14% од нив дека тоа е секојдневно. Интересен е и фактот дека 9% одговориле потврдно дека во нивното училиште постои и сексуално вознемирување.

Фаталните и нефаталните напади меѓу младите луѓе во најголем број придонесуваат во зголемување на бројката на предвремени умирања, тешки повреди и инвалидитет. Сето тоа длабоко ги повредува не само жртвите, туку и нивните семејства и пријатели. Се проценува дека во 2000 година во светот се случиле околу 199 000 убиства на млади луѓе. Во Македонија во 2004 година се осудени малолетни сторители за следниве кривични дела: 8 за телесна повреда, 17 за тешка телесна повреда, 2 за учество во тепачка, 2 за убиство, 2 за силување, 3 за полов напад итн.

Црвениот крст, како организација, работи на многубројни теми каде што како цел се појавува подигнувањето на свеста кај младите за одредени проблеми и наоѓањето решенија за нив. Една од тие теми е и насилството меѓу младите (врсничкото насилство), проблем кој иако постојано го гледаме околу нас, никој не презема акција за да го реши. Затоа ние, Црвениот крст, ќе преземеме активности коишто ќе ја подигнат свеста меѓу учениците за ризикот и последиците од насилството, како и да научат многу техники за негово спречување.

Мисли, зборувај-толеранција создавај

Црвениот крст, како организација, работи на многубројни теми каде што како цел се појавува подигнувањето на свеста кај младите за одредени проблеми и наоѓањето решенија за нив. Една од тие теми е и насилството меѓу младите (врсничкото насилство), проблем кој иако постојано го гледаме околу нас, никој не презема иницијатива да го реши. Затоа ние, ООЦК „Гази Баба” - Скопје, ќе покренеме активности коишто ќе ја подигнат свеста меѓу учениците за ризикот и последиците од насилството, како и да научат многу техники за негово спречување.

Општина „Гази Баба” и општина „Петровец” се мултиетнички општини во кои заедничкиот живот се отежнува со постоење на проблемот на меѓуврсничко насилство во одредени учичишта на териториите на овие општини.

Податоците за степенот на насилство доаѓаат до обичните граѓани само доколку има жртви или повредени во некое училиште. Затоа самите ученици се најдобар примерок за да се добијат релевантни податоци.

Со спроведување на прашалник кај 219 момчиња и 215 девојчиња од шесто и седмо одделение, во пет основни училишта, во кои наставата ја посетуваат ученици од различни етнички заедници, на териториите на општините „Гази Баба” и „Петровец”, се добија резултати дека:

над 20% од момчињата и над 12% од девојчињата секојдневно забележуваат насилство помеѓу своите соученици, а над 21% од момчињата и над 28% од девојчињата сведочат за насилство меѓу своите соученици повеќепати во текот на полугодието, што ја прави присутноста на овој проблем значително загрижувачка;

над 35% од девојчињата и 42% од момчињата биле присутни за време на тепачка помеѓу своите соученици, а над 33% од момчињата и над 8% од девојчињата изјавија дека барем еднаш удриле некој од своите соученици;

над 58% од момчињата и над 62% од девојчињата забележале како учениците се навредуваат и исмејуваат меѓусебно;

Позитивен резултат од прашалникот е тоа дека учениците имаат доверба во своите наставници кога станува збор за проблемот на меѓуврсничко насилство, бидејќи над 64% од девојчињата и над 68% од момчињата, доколку се жртви на ваквиот тип на насилство, тоа ќе го пријават кај своите наставници.

Прашалникот беше спроведен со цел да се согледа колку учениците од шесто и седмо одделение го забележуваат меѓуврсничкото насилство и дали се дел од насилно однесување.

Четиримесечен проект ќе се труди на што повисоко ниво да ги реализира своите цели и да помогне во обучување и позитивна промена како кај учениците во полза на намалување на меѓуврсничкото насилство исто така и во зголемување на толеранцијата меѓу различните етнички групи на територијата на општините „Гази Баба” и „Петровец”.

Направи чекор

Проблемот на социјална неприфатеност е многу малку експониран од страна на многубројните организации (владини и невладини), училиштата и други установи во кои се работи со деца, пред се поради немањето стручни кадри кои ќе го детектираат проблемот и ќе пристапат кон негово решавање. Социјалната неприфатеност е проблем кој бара многу време и многу работа за негово отстранување. Во работата со социјално неприфатените деца, првично треба да се разгледаат факторите кои довеле до таквото однесување, семејството, опкружувањето, врсниците итн. Откако ќе се согледаат факторите кои влијаеле, ќе се пристапи кон нивно елиминирање, односно намалување на влијанието.

Социјалната неприфатеност доведува до развој на сериозни проблеми во личноста на детето и ризици по менталното здравје. Како последица на овој проблем,многу често се случува децата да прераснат во личности кои имаат проблеми со законот, стануваат зависници од алкохол, наркотични средства, даватели на сексуални услуги, лица без морал, лица без волја да напредуваат во животот и се препуштаат на депресијата и меланхолијата, кои доведуваат до голем број самоубиства или убиства на други лица кои се во подобра економска и социјална положба (им пречи тоа што некој друг постигнал во животот повеќе од нив и најчесто ги обвинуваат другите за својот личен неуспех).

Од горе наведеното, можеме да заклучиме дека проблемот е навистина реален и проширен во големи размери и во нашата земја. Многу често можат да се забележат осамени деца кои не зборуваат за своите проблеми едноставно затоа што немаат доверба во никого и живеат во свет кој самите си го формирале, утопистички свет во кој бегаат од реалноста која ги повредува.

Целта на овој проект е преку директно навлегување во училиштата преку соодветни психолошки постапки да ги открие децата кои се социјално неприфатени и истите да ги влкучи во пректот за социјализација без притоа да бидат откриени и етикетирани од страна на другите ученици. На овој начин ќе се откријат причините кои довеле до асоцијализација на децата, односно дали како фактор се јавува семејството, училиштето или врсничката околина на младиот. Со самото откривање на факторот кој довел до проблемот асоцијализаицја, ќе се работи на негово елиминирање и преобразба на личноста на детето во правец на добивање самодоверба и почит кон сопствените квалитети и способности.

Во овој проект ќе бидат вклучени вкупно 24 деца од 6 основни училишта на Општина Гази Баба, со различна етничка припадност што во најголема мера ќе исклучи секаков вид на дискриминација. Учениците ќе бидат детектирани по пат на психолошки тест – социограм, кој е еден вид на постапка која ни овозможува брзо и лесно информирање за структурата на малите групи и статусот на учениците, кој е најприфатен во одделението, кој е осамен, кој не може да се адаптира во одделението итн. Учениците кои ќе бидат издвоени како социјално најприфатен и социјално - неприфатен во овој проект, нема да ја знаат намерата на проектот, наместо тоа ќе бидат повикани како волонтери во Црвениот Крст на Општина Гази Баба, кои се потребни за реализација на неколку активности во тековната година. Резултатите од нивната активност ќе бидат презентирани пред своето училиште со што ќе биде организиран и натпревар меѓу учесниците во проектот на крајот од годината, по завршените активности со цел дружење и проверка на знаењето од поминатите обуки. Активностите кои ќе се имплементираат од страна на учениците и обуките низ кои ќе поминат ќе бидат презентирани во проектот секоја одделно со својата специфична цел.

За проектот и неговите цели ќе бидат информирани наставниците од одделенијата со кои ќе работиме и родителите на децата, кои ќе бидат информирани за проблемот на нивното дете а истовремено во соработката со родителите ќе можеме да ја процениме и нивната семејна состојба и проблемите со кои се соочува детето.

Нашата организација располага со обучени лица од профилот на психолози, социјални работници и социолози кои ќе помогнат во одвивањето на проектот и ќе бидат во делот на работа со децата, помош за нивна полесна социјализација, евалуација на настаните и активностите која ќе биде преземана со секој направен чекор во проектот со цел превентивно да се дејствува и навремено да се корегираат грешките. Децата кои ќе се вклучени во проектот, а тоа се вкупно 24 деца, (12 социјално прифатени - најприфатените деца во одделението и 12 социјално неприфатени) ќе имаат можност да соработуваат преку остварувањето на предвидените активности, со тоа што социјално прифатените деца ќе можат подобро да ги запознаат социјално неприфатените и со нив да формираат пријателства на база на заеднички интереси и дружење. На тој начин социјално - прифатените ќе помогнат во интегрирањето на социјално неприфатените деца во одделенијата, ширејќи позитивни вредности за нив на останатите деца во одделението. На овој начин ќе се подобри социјалната структура во одделенијата и ќе се намали бројот на потенцијални негативни личности во општеството и поголем број на здраво формирани семејства.

Младите во борба против трговијата со луѓе

Оправданост содржи анализа на проблемите, целите, релевантните активности и предложениот пристап (стратегија). Оправданоста треба да одговара на соодветниот контекст. Во овој дел се преоѓа од општ кон специфичен контекст. За нивоата види општ контекст.

Трговијата со луѓе е сериозен и сложен меѓународен проблем, трет по големина криминален бизнис по трговијата со дрога и оружје, и еден од растечките форми на организиран криминал на глобално ниво, кој е присутен како во сиромашните и недоволно развиени земји така и во развиените земји. Државите од Југоисточна Европа, кои долги години минуваат низ политичка и економска транзиција, посебно се засегнати со овој проблем, првенствено, како земји на потекло на жртви на трговија. Разиените земји, првенствено, се земји на дестинација и транзит. Трговијата со луѓе е сериозен општествен проблем и претставува најтешка форма на кршење на основните шовекови права – правото на живот, на слободно движење, на слобода на избор и други права и слободи. Милиони жени, деца, но и мажи, секојдневно се принудуваат на проституција, питачење, слугување во куќи, работа на плантажи и на други видови принуда. Македонија за разлика од другите земји во регионот, заради својата местоположба, во изминатиот период беше земја на транзит и дестинација на жртви на трговија – странски државјани, кои беа тргувани првенствено, за сексуална експлоатација. Меѓутоа, последниве години Македонија стана земја на потекло на жртви на трговија, и македонски државјани се тргувани во други земји. Од 2004/05 година кога се откриени првите жртви на интерна (внатрешна) трговија со луѓе, бројот на овие жртви е во постојан пораст. Особено загрижува се поголемиот број на малолетни лица – жртви на трговија со луѓе кај нас. Исто така, сите релевантни меѓународни показатели укажуваат на тоа дека расте бројот на деца – жртви на овој криминал. Се претпоставува дека 4 милиони лица годишно стануваат жртви на трговија. Од нив најголем број се жени, кои се тргувани за сексуална експлоатација, а се тргува и со голем број на деца и мажи кои се жртви на трудова и други форми на експлоатација. Меѓународната организација за миграции проценува дека годишно, преку меѓународните граници, се тргуваат околу 2 милиони луѓе. Според УНИЦЕФ бројот на деца, кои се жртви на трговија со луѓе е околу 1,2 милиони годишно. Според Обединетите нации, 700.000 жени, деца и мажи секоја година стануваат жртви на трговија. Стејт департментот на САД проценува дека до 900.000 жени, деца и мажи годишно постануваат жртви на трговија со луѓе. Најновиот извештај на меѓународната организација на трудот (ИЛО) во поглед на присилниот труд, посочува дека, како жртви на трговија се проценуваат 2,5 милиони луѓе, од кои најмалку 1/3 се предмет на продажба заради економска експлоатација.

Најновите податоци за жртви, тргувани во Македонија (странски и македонски жртви) кои се идентификувани и на кои им е укажана помош, покажуваат дека:

Вкупниот број на жртви, странски државјани, на кои им е укажана помош во Македонија, од 2000г. до 2009г. изнесува 778.

Вкупниот број жртви македонски државјани, од откривањето на проблемот во 2004г. до декември 2008г., идентификувани се 83 жртви, а заштита во засолниште добиле 52. Од нив околу 40% се малолетни жртви – деца.

Последните извештаи наведуваат дека внатрешната трговија е се почеста појава. Според УНДП во државите на Западен Балкан се намалува бројот на странски државјани, а се зголемува бројот на жртви на внатрешната трговија со луѓе (Албанија, Босна и Херцеговина, Македонија, Србија, Црна Гора и Косово). Особено во Косово бројот на лица – жртви на внатрешната трговија е многу висок.

Според извештајот на Европската унија од 2004 година за состојбата на организираниот криминал, на глобалната скала, трговијата со луѓе претставува бизнис тежок од 8,5 до 12 милијарди евра годишно. Профитите генерирани преку трудовата експлоатација на жени – жртви на трговија со луѓе, мажи и деца, според проценката на меѓународната организација на трудот изнесува 32 милјарди американски долари годишно. За разлика од другите видови на илегален бизнис, трговијата со луѓе, во основа е заснована врз активности кои најбрутално ги повредуваат основните човекови права – правото на живот, слободното движење, слобода на избор, со што се руши и оспорува човековиот дигнитет.

You are here

Проекти за подршка