Реализирани проекти

Опремување на ТОК

Со зголемување на економско-техничкиот развој на човештвото се зголемуваат и видовите катастрофи, што ги трпи човекот. Сето тоа се должи на постојаното уништување на човековата околина, зголемувањето на населението и на сиромаштијата.

Оваа ситуација ја наметнува потребата од создавање специјален тим кој може да одговори на терен во случај на катастрофа, но и превентивно да влијае врз населението, преку разни едукации и презентации. Таков тим, составен од луѓе кои сакаат да помогнат во вакви ситуации, поседува и Општинската организација на Црвен крст „Гази Баба”-Скопје. Тимот е составен од 15 до 20 луѓе, од кои 7 го сочинуваат првиот тим, а останатите се во резервниот состав. Членовите на овој тим имаат поминато одредени обуки (логистика, прва помош, спасување на вода, спасување на планина), сепак за подобро да интервенираат потребни им се и дополнителни обуки што ќе ги направат професионалци во својата област. Како благодарност Тимот за одговор при катастрофи секогаш ќе биде на располагање за потребите на населението на општина Гази Баба, преку покривање на разни манифестации, собири, како и во случај на непосакувани случувања, како на пример катастрофи.

ХИВ/СИДА и СПИ

Според последните статистички истражувања, границата на сексуално активни луѓе е се помала и сексуално активни стануваат веќе од 12 години. Младата популација е не информирана за голем број прашања кои се од суштинско значење за развој на здрава популација. Прераната сексуална активност на млади луѓе кои не се доволно информирани за начините за заштита од ХИВ/СИДА и СПИ кои се пренесуваат преку сексуален акт, доведува до зголемување на процентот на заболени од ХИВ/СИДА и бројот на сексуално инфицирани лица, кое дополнително влијае за зголемување на бројот на абортуси кај младата популација. Исто така кај младата популација постои и неинформираност за заштита од несакана бременост и правилно користење на контрацепција. Со овој проект на младите ќе им се овозможи обука преку која ќе се здобијат со знаења за ХИВ/ СИДА и СПИ, како и заштита од полови инфекции и несакана бременост. Овој проект на оваа целна група дава одговор на голем број прашања како: Што е ХИВ? Што е СИДА? Колку брзо ХИВ позитивните лица ја развиваат болеста СИДА? Како не се / се пренесува ХИВ? Како се намалува ризикот за заразување преку сексуален контакт? Кои лица имаат поголем ризик за заразување? Дали на работно место здравствените работници може да се заразат со ХИВ? Има ли лек за СИДА? Постои ли вакцина? Како изгледа лице што е ХИВ позитивно? Целата замисла за поблизок пристап на оваа проблематика на целната група на возраст од 13 – 18 години е преку врсничка едукација која ќе ја реализираат волонтери од Клубот на млади на ООЦК Гази Баба а кои имаат поминато соодветна обука за оваа тема. Предвидено е едукацијата да биде интерактивна и без присуство на субјекти кои ке влијаат во отворената дискусија за која најчесто младите се срамат да говорат. Одговорот на сето она што ги интригира младите а што не го знаат ќе допринесе развој на младите луѓе во нормални личности а тоа значи и развој на здрави општествени заедници.

Афирмација на крводарителството и мобилизирање на млади крводарители

Крводарителството во Република Македонија це темели на принципите на доброволност, анонимност, бесплатност и солидарност. Водејќи се од ваквите принципи, Република Македонија континуирано обезбедува количества крв и крвни продукти за задоволување на потребите од оваа бесценета течност. Цо самото дарување на крв, крводарителот изразува највисок степен на солидарност со сите оние на кои таа им е потребна, без оглед на возраст, пол, раса, боја, национална и верска припадност. Цо придржувањето кон споменатите принципи, Република Македонија ги исполнува сите поставени услови од страна на Светската здравствена организација и Меѓународната Федерација на друштвата на Црвениот крст и Црвената полумесечина.

Најновите статистики покажуваат дека како во светот, така и кај нас процентот на крводарители постепено опаѓа, а со тоа згаснува хуманоста и солидарноста. Во светот помалку развиените земји це трудат 1% од населението да бидат редовни крводарители, а повеќе развиените, 5% редовни крводарители од целокупното население. Секојдневните потреби од крв и крвни продукти, постојано алармира дека сме во неповолна состојба во однос на задоволување на потребите за крв, а со тоа и спасување на човечки живот.

Здрави деца за посветла иднина

Однесувањето и навиките за грижа кон сопственото здравје на една личност се оформуваат уште во раната детска возраст и истите имаат големо влијание врз нејзиниот подоцнежен развој.

Затоа е нужно потребно, здравствената едукација да започне што е можно порано, уште во текот на раното детство. Здравствената едукација е интегрален дел од примарната превенција. Истата се смета дека претставува низа на активности кои им помагаат на партиципиентите да си помогнат самите себеси, за да ја превенираат појавата на можни здравствени проблеми и да ја унапредат состојбата на здравствен и психофизички план.

Проектот има за цел да ја промовира здравствената едукација на децата како важен начин за нивно мотивирање со цел, превземање на поголема одговорност и грижа за сопственото здравје.

Имплементацијата на здравствената едукација во раната детска возраст се смета како нужна, со цел да се превенира можната појава на заболувања во текот на подоцнежниот растеж како: деформитети на рбетниот столб, појава на зголемена телесна тежина, проблеми со видот, заболувања на забите (особено често децата страдаат од кариес), алергии, дијабетес итн. Здравствената едукација ќе треба да им помогне на децата од предшколска возраст да изградат здрави навики кои ќе им помогнат правилно да одлучуваат за поголема физичка активност и да се исхрануваат правилно во текот на секојдневниот живот. Да ги охрабрат децата да воспостават здрави навики кои ќе се задржат во текот на целиот живот, да им се помогне да го разберат концептот за здравје и болест, за причино-последичната врска од нивното однесување, но и да ги охрабрат во развивањето на самодовербата и донесувањето на одлуки и превземањето на соодветни активности во насока на грижа за своето тело и здравје.

ПП за деца во градинки

Една од најважните работи кон кои се стреми Црвениот крст е будење на свеста за Првата помош кај најмладата попуација, посебно во ова време на сè почести сообраќајни несреќи, природни катастрофи, епидемии, срцеви удари или несреќи во домот, како и поради свесноста за присутноста на климатските промени.

Првата помош, се состои од низа активности кои нудат заштитни превентивни мерки за спасување на животот, подготвеност и одговор при состојби кои бараат итност, а се поврзани со здравјето. Кога луѓето се подготвени да се справат со ситуации во секојдневниот живот кои можат да им го загрозат животот, тодаш тие се спремни соодветно да одговорат на најразлични ситуации и во услови на криза.

Децата од најмала возраст имаат чуство на достоинство и потреба од развивање на свеста за солидарност и дружељубивост. Учењето за Прва помош е значајно за потребите на семејството и заедницата, едноставно учењето на солидарност е корисно за одржување на хуман животен стил.
Децата во развој се ранлива категорија и целта на активистите на Црвениот крст е да ги запознаеме со поимот хуманост и солидарност, и дополнтелно да ги мотивираме да научат како да се заштитат при повреда и да им помагаат на своите врсници. Тие преку игра треба да научат да не бидат агресивни со своите врсници и да не се плашат од повреди, туку свесно да се заштитат и да побараат помош.

Општински натпревар по Прва помош

Будењето свест за Првата помош кај младата популација е една од најважните работи за кои се залага Црвениот крст, посебно во ова време на сè почести сообраќајни несреќи, природни катастрофи, срцев удар, епидемии или несреќи во домот, како и поради свесноста за присутноста на климатските промени.

Првата помош е гест на хуманост која се состои од низа активности кои нудат заштитни превентивни мерки за спасување на живот, подготвеност и одговор при состојби кои бараат итност, а се поврзани со здравјето. Првичниот одговор има за цел намалување на влијанието на овие состојби и стабилизација, третман на погодените луѓе се додека стигне професионалната (медицинска) помош, ако е потребно.

Како главна мотивација за учење на Прва помош кај младите, се користи ривалството помеѓу училиштата и желбата за да се биде прв. Овие причини доведуваат до организирање натпревар по Прва помош. Благодарение на натпреварот по Првата помош, младината се обучува првенствено за пружање помош себеси, а понатаму за пружање помош на своите најблиски, како и за другите лица погодени од некоја несреќа.

Младоста и искуството моќта на хуманоста

Старите изнемоштени лица со и без инвалидитет треба да се третираат како и сите останати луѓе коишто можат да се лекуваат. Луѓето од повисоките скалила на хиерархиската пирамида мора да разберат дека здравјето на овие луѓе не е само работа на специјалистите, туку е предмет на интерес на целата општествена заедница. Еден од најзначајните чекори коишто треба да се преземат е и вклучувањето на семејствата во грижата и рехабилитацијата на овие лица и претставува клучен фактор за нивната успешна грижа

Грижата за здравјето на овие луѓе е колективен и континуиран потфат. Од големо значење е правилното дејствување на Црвениот крст во моментите кога на луѓето помошта им е најнеопходна т.е кога настанува или е настанат здравствен хендикеп. Голем број од инвалидизираните но и од старите лица кои се без инвалидитет, најголем дел од месечните примања ги трошат на лекување а во дел од случаевите не стасуваат ниту за основната медицинска потреба. Црвениот крст несебично се заложува во акциите за помош на секој човек со што истовремено придонесува општествената заедница да ги реализира актуелните здравствени, социјални и хуманитарни задачи. Активностите што ги реализира Црвениот крст, покрај социјалниот и морален ефект имаат и изразито воспитно влијание особено кога за тоа се ангажираат младите луѓе. На тој начин вклучувајќи ги лицата со инвалидитет и младите лица во многу активности ние се обидуваме да ги отргнеме од можните деструктивни влијанија и нивната негативна енергија да ја пренасочиме во позитивни дела за општеството. Како причини за појавата на проблемите со кои се соочуваат пензионираните лица со инвалидитет е и настанувањето на економската и социјална криза кои продуцираат низа на социјални проблеми и зголемување на сиромаштијата, потоа неедуцираноста на лицата т.е членовите на нивните семејства и пред се на младите како тие треба да помогнат на старите лица со и без инвалидитет. Токму поради таквата можна отфрленост, нашата цел е да се пријде поблиску до пензионираните лица со инвалидитет, да се разбијат одредени предрасуди, да добијат вистински информации за односот на младите кон старите лицата воопшто. Сметаме дека тоа би вродило со резултат бидејќи ќе допринесе за еден поотворен, искрен, однос, каде што ќе може слободно да се разговара за проблемите што ги засегаат не само старите лица туку и младите. Се стремиме кон тоа да се создаде една нормална работна атмосфера, без дискриминирање, чувство на отфрленост или било каков впечаток на неприфаќање во општеството.

You are here

Реализирани проекти